54-New Ray

အခွန်တိုးမြှင့်ကောက်ခံခြင်းကြောင့် မီးသွေးလုပ်ငန်းလုပ်ကိုင်သူများ စာဝတ်နေရေးကြပ်တည်းလာ
Monday, 26 January 2009 17:19 ဖြိုးကြီး
(ရိုးမ ၃ သတင်းဋ္ဌာနမှ ကောက်နှတ်တင်ပြပါသည်)

ပလောင်ဒေသအတွင်း အာဏာပိုင်အဖွဲ့များက မီးသွေးလုပ်ငန်းလုပ်ကိုင်နေသူများထံမှ အခွန်များ တိုးမြှင့်ကောက်ခံနေသည့်အတွက် ဒေသခံများ စာဝတ်နေရေးအခြေအနေ ပိုမိုကြပ်တည်းလာသည်။ရှမ်းပြည်နယ်မြောက်ပိုင်း မန်းဝီး-နမ့်ခမ်းလမ်းတလျှောက်တွင် ရဲ၊ သစ်တော၊ စစ်တပ်၊ အကောက်ခွန်နှင့် ပြည်သူ့စစ်အဖွဲ့များက ယခုနှစ်စပိုင်းမှ စတင်ကာ အခွန်များ တိုးမြှင့်ကောက်ခံနေခြင်းကြောင့် ဖြစ်သည်။"ကားတစ်စီးမှာ မီးသွေးက ပိဿ (၆,၀၀၀) လောက်ပဲ တင်လို့ရတယ်၊ အဲဒါ အကုန်ရောင်းမှ (၈) သိန်းလောက်ရတာ၊ ကားခက (၃) သိန်း ပေးရတယ်၊ အဲဒီလမ်းတလျှောက် အာဏာပိုင်အဖွဲ့တွေကို ပေးရတာက (၂) သိန်းခွဲလောက်ကုန်တယ်၊ အရင်တုန်းက ကျနော်တို့ ဒီလောက်မပေးရဘူး၊ အခုတော့ အမြတ်မပြောနဲ့ အရင်းတောင်မရဘူး" ဟု မီးသွေးကုန်သည်တဦးက ပြောသည်။ယခင်ကလဲ ယခုကဲ့သို့ အဖွဲ့ပေါင်းစုံက အခွန်ကောက်ခံခြင်းများရှိခဲ့သော်လည်း ယခုအခါ ပိုမိုတောင်းယူလာသည့်အပြင် နည်းအမျိုးမျိုးဖြင့် ခြိမ်းခြောက်မှုများပါ ရှိနေကြောင်း ဒေသခံကုန်သည်က ဆက်ပြောသည်။ပလောင်လူမျိုးများသည် လ္ဘက်လုပ်ငန်းဖြင့် အသက်မွေးဝမ်းကြောင်းပြုကြသူများ ဖြစ်သော်လည်း လ္ဘက်ရာသီချိန်ပြီးလျှင် မီးသွေးလုပ်ငန်းကို လုပ်ကိုင်ကြပြီး ယခုကဲ့သို့ အာဏာပိုင်အဖွဲ့များက အဆမတန် ငွေကြေးတောင်းယူမှုများကြောင့် ဒေသခံများ စားဝတ်နေရေး ပိုမိုကြပ်တည်းလာကြောင်း တအာဝ်းကျောင်းသားနှင့် လူငယ်များအစည်းအရုံးမှ မိုင်းအောင်ကို က ပြောသည်။"ကျနော်တို့ပလောင်လူမျိုးတွေက လ္ဘက်ရာသီချိန်မဟုတ်တဲ့အခါကျတော့ လ္ဘက်ကနေ အားကိုးလို့ မရတဲ့အခါကျတော့ အဓိက သစ်တောတွေကို သူများဆီက ဝယ်ယူပြီး မီးသွေးဖုတ်ရတာ၊ ပြီးရင် သယ်လာပြီး ရောင်းရတယ်၊ အဲလို အခွန်တွေ မတရားများလာတဲ့အခါကျတော့ ဒီလုပ်ငန်းနဲ့ အဓိက အသက်မွေးဝမ်းကြောင်းနေတဲ့သူတွေ အခြေအနေက တော်တော်ဆိုးရွားလာတယ်" ဟု ပြောသည်။စစ်အစိုးရအာဏာပိုင်များက ပလောင်ဒေသအတွင်း ယခုကဲ့သို့ ငွေကြေး မတရားတောင်းယူနေခြင်းအပြင် အခြား လူ့အခွင့်အရေး ချိုးဖောက်မှုများနှင့် မူးယစ်ဆေးဝါးလုပ်ငန်းများကိုလည်း ပတ်သက်လုပ်ကိုင်နေခြင်းများရှိကြောင်း ဒေသခံများက ပြောသည်။

.....................................................................................................